ارشد اقبال آرش
اصل ناں ملک ارشد اقبال
قلمی ناں ارشد اقبال آرشؔ
جمن 1970ء
جاہ پتہ ملتان
ارشد اقبال آرشؔ دا تعلق ملتان نال ہے ،لیکن اکثر اوہ پاکستان توں باہر رہ ویندن۔اردو تے سرائیکی ڈوہائیں زبانیں وچ شاعری کریندن ۔اردو شاعری اچ انہاں غزل، گیت ، ہائیکو تے ماہئے لکھے ہن ۔بلکہ ماہئے دے حوالے نال بین الاقوامی ماہئیں دا انتخاب وی انہاندی ہک کتاب ’’ باغوں میں بہار آئی‘‘چھپ چُکی ہے۔جتھوں تک آرشؔ صاحب دا سرائیکی شاعری نال تعلق ہے تاں آپ حضرت مشکور قطبپوری دے آخری زمانے دے شاگرد ہن ،تے انہاندی راہنمائی وچ ڈوہڑے سمیت تقریباََ ساریاں صنفاں لکھدن، تے خوبصورت شاعری کریندن۔
(1) غزل
[لکھو | ماخذ وچ تبدیلی کرو]حسن دی شہزادی نہ در در رولیں ہا غیراں نال نہ دل دیاں گالھیں پھولیں ہا
ظالم لوک ہن بھانبھڑ چا بھڑکیندے ہن سوچیں ہا کجھ کہیں دے راز نہ کھولیں ہا
منہ توں نکلی ہر ہک گالھ پرائی ہے بولن کولوں پہلے گالھ کوں تولیں ہا
جو وی ہن او کھیڈاں ساڈے بچپن دیاں سوہنیاں کھیڈاں ہن او کھیڈاں گولیں ہا
عمر گزاری ساری آرشؔ ہیں سک وچ کہیں ویلے تاں مٹھڑے بول ڈو بولیں ہا
(2) غزل
[لکھو | ماخذ وچ تبدیلی کرو]خدا دا ہک شاہکار ہیں توں اساڈے دل دا قرار ہیں توں
شراب کیا شئے ہے نشے کیا ہن حقیقی نشہ خمار ہیں توں
حیا دی پُتلی وفا دی ملکہ انوکھی الفت پیا ر ہیں توں
میں تیڈے باجھوں اداس رہنداں میڈے امن دی گزار ہیں توں
اے تھی گئے میکوں یقین آرشؔ میڈے چمن دی بہار ہیں توں
٭٭٭