ارسلان غزنوی

ارسلان غزنوی
معلومات شخصیت
ڄمݨ	سنہ 1101ء
تاریخ وفات	سنہ 1118ء (16–17 سال)
شہریت	سلطنت غزنویہ
پیو	مسعود سوم
ماء	گوہر خاتون
ٹٻر	سلطنت غزنویہ
مناصب
سلطان سلطنت غزنویہ
برسر عہدہ 1114  – 1117
f9f9f9; color:#000; margin: 0 0 0 0; border-collapse: collapse;" بہرام شاہ غزنوی

سلطان ارسلان غزنوی 1114ء وچ اپݨے پیو سلطان مسعود غزنوی سوم دے بعد تخت نشین تھیا۔ ایں نے تخت تے ٻیٹھدے ہی اپݨے بھراواں کوں گرفتار کر ڳھدا، لیکن بہرام شاہ غزنوی بھڄ کے سلطان احمد سنجر دے کول پناہ گھنݨ وچ کامیاب تھی ڳیا۔

ارسلان نے بہرام دی واپسی کیتے سنجر کوں خطوط بھیجے لیکن سنجر نے بہرام دی مدد کرݨ دا فیصلہ کیتا۔ سنجر ہک وݙا لشکر ڳھن کے بہرام دے نال غزنی تے حملہ آور تھیا۔ ارسلان نے سنجر نال صلح دی کوشش کیتی لیکن ناکام ریہا۔ اوں دی ماں مہوعراق، جیہڑی سنجر دی بھیݨ ہئی اتے ارسلان دے مظالم توں ناراض ہئی، نے وی سنجر کوں ارسلان تے حملہ کرݨ دی ترغیب ݙتی۔

مجبور تھی کے ارسلان نے جنگ دی تیاری کیتی اتے ہک وݙا لشکر ڳھن کے سنجر دے مقابلے وچ آیا۔ ابتدائی طور تے ݙوہیں طرف توں سخت مقابلہ تھیا، لیکن سیستان دے بادشاہ ابوالفضل دی مدد نال سنجر اتے بہرام دی فوج غالب آ ڳئی۔ ارسلان شکست کھا کے ہندوستان دی طرف بھڄ ڳیا اتے سنجر فاتح دی حیثیت نال غزنی وچ داخل تھیا۔ سنجر نے چالھی ݙینہہ غزنی وچ قیام کیتا اتے حکومت بہرام شاہ غزنوی دے سپرد کر کے خراسان واپس چلا ڳیا۔ واپسی تے سنجر غزنی دے خزانے توں ٻہوں سارا قیمتی مال وی ڳھن ڳیا۔

ارسلان نے ہندوستان توں فوج تیار کر کے دوبارہ غزنی تے حملہ کیتا، لیکن بہرام دے مقابلے توں قاصر ریہا اتے بامیان دے قلعے وچ پناہ ڳھدی۔ سنجر اچانک ارسلان تے حملہ آور تھیا جیندے توں او گھبرا کے بھڄ نکلا، لیکن سنجر دے لشکر نے اونکوں گرفتار کر کے بہرام دے حوالے کر ݙتا۔ بہرام نے فوری طور تے ارسلان کوں قتل کر ݙتا۔

سلطان ارسلان غزنوی نے تقریباً ترائے سال حکومت کیتی اتے 1117ء وچ اپݨے بھرا بہرام شاہ غزنوی دے ہتھوں قتل تھیا۔ اوں دا دور حکومت انتشار اتے آسمانی آفات دا شکار ریہا جیندے توں غزنی کوں ٻہوں نقصان تھیا۔