ارائیݨ…مالݨ

ارائیݨ دا کردار ہک نوکراݨی آلا ہے ۔ ایہ وݙے گھراں وچ ریڑکے رڑکیندی ہے تے لسی ،مکھݨ ، کھیر بݨیندی تے کھیر ڈوٖہیندی ہے۔ ایندے توں انج ایندا کم ہار پووݨ وی ہے ایہ شاہی گھراں وچ ہار پوتے ونڄ وچیندی ہے ۔ تریمتیں ہووݨ کاݨ انہاں توں گھر دے اندر تئیں دی رسائی ہوندی ہے ایہ گھر گھر دی اُنگ سنگ رکھیندِن ۔ گھر دیاں ذالیں نال ڈھیر یارانہ ہووݨ کاݨ گھر دیاں راز آلیاں ڳالھیں وی انہاں کول ہوندن۔

لوک قصیاں وچ ایہ ہک ٻہوں متحرک کردار ہے جیڑھا گھراں وچ وڑا ودے تے گھراں دے سبھے حال حویلے سُݨیندے ۔ بھل ایہ تاں گھر دیاں تریمتیں دا راز دار وی ہوندے تے کݙاہیں کݙاہیں یاریں کیتے پیغام رسانی دا کم وی کریندے ۔ اِیݙوں دی اُݙے لاوݨ انہاں دی فطرت وچ شامل ہوندے ۔پیسے دی لوبھ لالچ وچ ایہ ݙوجھیاں دے جھڳے دے جھڳے برباد کر ݙیندے ہر آئے ڳئے نال تعلق واسطہ ڳنڈھݨ انہاں دے کھٻے ہتھ دا کم ہوندے ۔ انہاں دے ہتھ کنوں وݙی خوبی انہاں دی دناوت تے ہوشیاری ہوندی ہے ۔ لوک قصیاں وچ انہاں دا کردار ہک اخبار آلا ہوندے ۔ بھل ہک لائیو ٹی وی چینل آلا جو کجھ جتھاں وی ݙٹھے اونکوں اڳوں پُچاوݨ فرض عین سمجھدے۔

ایہ لوکیں دیاں سوہݨیاں ذالیں کوں ݙیکھ تے امیراں ، بادشاہواں اَتے سوداگراں کوں ونڄ ݙسیندے جو تیݙیاں کیا ذالیں ہِن جیڑھی اوندی ہے ۔ کہاݨی ہک ہا بادشاہ وچ مالݨ دا کردار ݙیکھو۔

’’اوں زمانے وچ سوداگرسفر وچ ذال تے اپݨے ٻال نال رکھیندے ہن تے جݙاں سوداگر دے ٻیڑے کندھی لڳن ہا تاں مالݨ سوداگراں دیاں ذالیں تے ٻالاں کیتے گجرے تے سہرے گھن آون ہا ۔ ہک ݙینہ ہک جہاز کندھی لڳا ۔ مالݨ سوداگر کیتے ہار گھن تے آ ڳئی ۔ سوداگردی زال اصلوں بدشکل تے کوجھی ہئی ۔ مالݨ ہار ݙتے تے ٻاہر نکلی تاں سوداگر مِل پیُس۔ آکھݨ لڳی:

’’زال جھلی ٻیٹھا ایں ۔ زال اے تاں گودی دے مزدور چن شہزادے دی چکوری اے ۔ جیندے حُسن دیاں دُھماں چوکوٹ ہِن۔‘‘

’’مالݨ دی ڳال سُݨ تے سوداگر دے دِل وچ چکوری کوں ݙیکھݨ دا شوق تھیا ۔ مالݨ کوں آکھݨ لڳا………

’’چکوری میکوں ݙکھا تیکوں انعام ݙیساں۔‘‘

حوالہ

سرائیکی لوک قصیاں دے کردار، مصنف : شہزاد اسد خان لغاری ، ناشر: جھوک پرنٹرز ‘ ملتان