ادبی ثقافتی سرگرمیاں

سپورٹس دے نال نال اساں ادبی ثقافتی سرگرمیاں وی کرویندے ہاسے، سکول اچ بزم ادب ٻہوں مضبوط ہئی، قومی ترانہ ، ملی نغمے، حمد تے خاص طور تے نعتاں اساݙے سکول دے ٻال اتنیاں سوہݨیاں پڑھدے ہن جو ہاں ٹھر ویندا ہا ۔ سکول دے نال نال اساں ݙوجھے شہراں دے مشاعریاں اچ وی شریک تھیندے ہاسے ۔خانپور، ظاہر پیر ، میانوالی دے مشاعرے اڄ وی یادیں دا حصہ ہن ۔ ایویں اساݙے سکول اچ موسیقی دیاں محفلاں وی تھیندیاں ہن ۔ قیس صاحب دے آوݨ نال ادبی ثقافی محفلاں کوں رنگ لڳ ڳئے ہن ۔خاص طور تے اساں اپݨے استاد قیس فریدی دی شاعری تے آواز دے عاشق ہاسے۔

اساکوں شاعری نال ٻہوں شغف ہا ، خاص طور تے نعتیہ شاعری میکوں ٻہوں پسند وی ہئی تے آپ وی شاعری کریندا ہم کیونجو سرور کائناتؐ نال محبت میݙے ایمان دا حصہ ہے ۔ اتے میں ہمیش توں سرکار ؐدے سہرے لکھداں ، جیکر کوئی ایجھی ڳالھ آوے جتھاں میں سمجھاں جو اے ڳالھ سرکار دو عالمؐ دے شایان شان کینھی تاں میکوں تڑپھاٹ لڳ ویندے ۔اساݙے ڄام پور دے ہک ش اعر لکھیا ’’ سرکار دا ڄمݨاں‘‘ ۔میں اوندے جواب اچ لکھیا:

شاعر بھرا کجھ ہوش کرڄمݨاں نہیں سرکار دا

قسم خدا ، ہے آوݨا ماہی مٹھے منٹھار دا

قیس صیب میݙا احترام کریندے ہن:

میݙے استاد قیس فریدی صاحب تے میݙی عمراں اچ اتنا زیادہ فرق نہ ہا ۔ میں توں ݙو ترائے سال وݙے ہوسن ۔ ماسٹر کریم بخش انوری صاحب تے میݙے استاد سینگے ہوسن ۔ عمر دے وچ ڈھیر فرق نہ ہووݨ دے باوجود میں استاد دی قدر پیو ماء وانگے کریندا ہم ۔ میݙے استاد وی میݙے اتے شفیق ہن تے میکوں ہمیشہ انہاں ماݨ تے احترام ݙتا۔ چار چوݙیں وچ میݙا تعارف ایویں کرویندے جیویں وݙے بندے دا کرویندے ،اے وی ہے جو ہر کم اساݙی صلاء ثواب نال کریندے ہن ۔ کوئی وی فیصلہ نہ کریندے ہن جے تئیں اساں صلاء اچ شریک نہ تھیووں ہا ۔ اساں وی اپݨے استاد دی صلاء دے بغیر کوئی فیصلہ نہ کیتا۔ اے ہا استاد شاگرد دا عظیم رشتہ ۔

حوالہ

کتاب "قیس فریدی ۔ فن شخصیت اَتے شاعری "  ترتیب پیشکش  : مہر حامد علی شاکر سیال ، ناشر جھوک پبلشرز ، ملتان