اجمیر کنوں دِلّی کن رونگی

اجمیر ہک ریلوے جنکشن ہے ۔ اساݙیاں ٹکٹاں ’’اجمیر توّی ڄمّوں ایکسپریس‘‘ دیاں بُک ہَن ۔ اساں ٹیشن تے پچیوسے تاں پتہ لڳا جو 1:10 تے ایہ ایکسپریس ’’ڄموں توّی اجمیر‘‘ دے ناں توں پُڄی  ہے اَتے ݙو وڄے ’’اجمیر توّی ڄموں ایکسپریس‘‘ بݨ کے روانہ تھی ویسی ۔ ریلوے دے عملے غسل خانے صاف کیتے ۔ پاݨی بھریا اَتے ݙو وڄے گݙی ولا پچھونہاں پندھ شروع کیتا ۔ ساݙے کول اَٹھ بندیاں کیتے چھی سیٹاں تے ݙو برتھاں ہَن ۔ گݙی ݙو وڄے ٹُر پئی ۔ ساݙے کھٻے پاسے تے پہاڑ نال نال ٹُردے پئے ہَن ۔ گݙی 2:35تے کِشن ڳڑھ پُڄی تاں پہاڑ گم تھی ڳے ۔ مٹّی دا رنگ ہلکا لال تھی ڳیا ہا ۔ ’’سیکھُو‘‘ تے’’ نارائنا دے ‘‘ٹیشن اُتّے گݙی نہ رُکی ۔ نارائنا دے بعد مٹی وچ لالی دا رنگ مُک ڳیا ایہ پہاڑی رنگ نظردا ہا یا سطح مرتفع دا۔ اگلا ٹیشن ’’پُھلیرا‘‘ آیا ۔ ایہ ہک جنکشن ہے ۔اِتھوں بیکنار(بیکانیر) واسطے ہک لائن ویندی ہے ۔ گݙی ہرودھا ‘ حاصل پورا ‘ کھنک پورا دے ٹیشناں تے نہ رُکی ‘ اڳوں جے پور آ ڳیا ۔ ایہ ہک وݙا جنکشن ہے۔

حوالہ

کتاب: دِلّی ڈھائی کوہ۔ مصنف شوکت مغل، چھپیندڑ: جھوک پبلشرز ‘ ملتان