اجمیر: راجستھانی کلچر دا نمائندہ شہر

اجمیر دے شہر وچ راجستھانی کلچر نمایاں ہے ۔ شہر دے لمّے کن پہاڑ ہِن ۔ اُتّے چھوٹے ٻوٹیاں نال ساول ہے ۔ پہاڑ اُتّے وݙے وَݨ کوئنیں ۔ ایہ پہاڑی سلسلے اجمیر توں دِلی آوݨ ویلے رستے وچ ساݙے نال نال ریہا ۔ ساکوں اِنہاں پہاڑاں اُتّے چڑھ کے اِنہاں کوں ݙیکھݨ دا موقع نہ ملیا ۔ بزار وچ راجستھانی کم دے ڳاہݨے وغیرہ بݨدے ݙٹھے ۔ راجستھان دے کالے لوک ٹُردے نظر آئے ۔ اِتھاں تریمتیں ساڑھیاں پیندن۔ مرد لُنڳی ٻدھیندے تے سِر تے پڳڑی ٻدھیندن ۔ شہر وچ راجستھانی ٹوپیاں ‘ ڳاہݨے‘ مٹھائیاں تے ویس وِکدے پئین ۔ زیور سازی دا کم عروج تے ہے ۔ لاکھ دا کم تھیندے ۔ اصلی پتھراں دا کم وی تھیندے ۔ عقیق کنوں تسبیاں ‘ چھلّے ‘ کڑے وغیرہ بݨدن۔ ڳاہݨیاں دے ڈیزائن روایتی تے پُراݨے ہَن ۔ ہندو عورتاں سلوار قمیض وی پیندیاں ہِن۔ سندھی ٻولݨ آلے ہندو وی ساکوں مِلے ۔ اُنہاں ݙسیا جو اِتھاں بعضیاں سکولاں وچ ٻالاں کوں سندھی وی پڑھائی ویندی ہے ۔

حوالہ

کتاب: دِلّی ڈھائی کوہ۔ مصنف شوکت مغل، چھپیندڑ: جھوک پبلشرز ‘ ملتان