آ ونڄ
اسیݙا آ ونڄ اتنا زائد نہ ہوندا ہا ، پلو شاہ خیر چنڳائی تھیوے ہا تاں وݙے کہیں ویلے نال گھن ویندے ہن ،رحیم یار خان دے نال سلطان پور نریجیں دی شادی تے وی ویندے ہاسے،مݙ بھورے آلے پاسے ٹھیڑی تے وی آ ونڄ تھیندا ہا ،ہیں پاسے چاچے فیضو خان زاہری دا گھرنیل گڑھء ِچ اَمدا ہا ،اُتھائیں وی آ ونڄ ہوندا ہا،ابے سئیں دا ہک ٻیا خُلق کھائی خیر شاہ نال واگھیں دی وستی ہا،اُتھائیں وی ݙاݙی نال ویندے ہاسے، دیگی بنگلے اساݙے سَکے ٻیٹھے ہن،اُتھائیں وی اَمدے ویندے ہاسے،ٻے سَکے سکھر ہن ،سالیں بعد اُتھائیں وی آ ونڄ تھیندا ہا۔اُونویں آس پاس دے سارے لوکیں نال تے سارے برادریں نال ابے سئیں دا ݙاڈھا تعلق ہا ، کُئی وستی ایجھی کائناں ہئی جتھاں ابے سئیں دے پنج ݙاہ شاگرد نہ ہونون،دعوتاں کر ویندے ہن تے پیریں آنگے قدر کریندے ہن، ہک واری ابے نال روہی آلے پاسے ڳیُم ، روہی توں پہلے نہر آئی نہر دی وَٹ ٻیریں ہن تے ٻیریں نال بھریاں پیاں ہن، کرے ٻیریں دیاں جھولیاں بھریاں ہن۔
حوالہ
[لکھو | ماخذ وچ تبدیلی کرو]کتاب: مُہاڳ، مصنف: ظہور احمد دھریجہ ، ناشر: جھوک پبلشرز ، ملتان