آگرہ دی تیاری

24؍اگست کوں سُنوار دا ݙینہ ہا اَتے ساکوں دِلّی اِچ آئیں پنجواں ݙیہاڑا  تھی ڳیا ہا۔ اَڄ اساں کجھ سنگتیاں دِلّی دی سیل دا پروگرام بݨایا ۔ عابد سیال ‘ جمشید دھریجہ تے میں ہک گروپ دی شکل اِچ ٹُر پیوسے۔ راشد مصطفیٰ تاں روز وانگ اپݨے گروپ نال سیل تے شاپنگ کرݨ ٹُر ڳئے ہَن۔ ظہور دھریجہ ‘ فرید پیرزادہ ‘ مجاہد بھٹی تے موہن بھگت پاکستانی ہائی کمیشن حاضری بھرݨ دی نیتی ہئی ۔ ظہور دھریجہ ساݙے ذمے لاتا جو پہلے آگرہ دیاں ٹِکٹاں بُک کرا ݙتے وَل سیل کرو ودّے۔

اساں نئوں وڄے بھون توں نکلے تے میٹرو ٹیشن راجندر پلیس تے پُڄ ڳیوسے۔ راجیو چوک دی ٹکٹ گھدّی تے میٹرو ٹُر پئی ۔ دِلّی دا ٹیشن راجیو چوک دے نال ہے ۔ پُچھدیں پُچھاندیں ٹیشن تے ڳیوسے ۔ نال اِی بُکنگ آفس ہا ۔ اندر ڳیوسے تاں آکھیا ڳیا جو ٻاہروں ریزرویشن فارم گھن آئو ۔ ٻاہروں آ کے ݙو فارم گھدّے ۔ ہک فارم تے چھی خانے ہَن اَساں ڈہ بندے ہاسے ۔ اُنہاں فارماں کوں پُر کیتا تاں جنس ‘ عمر ‘ گݙی نمبر’’ از‘ تا ‘ گھر دا پتہ ‘ فون نمبر لکھیا ‘ دستخط کیتے تے ریزرویشن دفتر تے اندر چلے ڳیوسے ۔ اندر ݙٹھا تاں حریانی تھئی تقریباً50کائونٹرنمبروار ہَن ۔ پہلے پنج اُتّے اسمبلی دے ممبران دی ریزرویشن تھیندی ہئی اَتے باقی عوام کیتے ہَن ۔ جتّھاں مرضی آوے کھڑو ونڄو اَتے بکنگ فارم کلرک کوں ݙے ݙئیو ۔ اَساں ہک جاء قطار چھوٹی ݙیکھ کے کھڑو ڳیوسے ۔ جمشید دھریجہ ساݙا اڳواݨ ہئی ۔ اَساکوں 25اگست دے ٹکٹ مِل ڳے ۔ آگرہ کیتے اساں ݙہ ٹکٹ بُک کرائے ۔ رقم ادا کیتی تے ایہ کم مکمل تھی ڳیا۔

حوالہ

کتاب: دِلّی ڈھائی کوہ۔ مصنف شوکت مغل، چھپیندڑ: جھوک پبلشرز ‘ ملتان