آگرہ دا سفر

اَڄ 25؍اگست ہئی تے منگل دا ݙینہ ۔ ٹیکسی آلیاں ݙو ٹیکسیاں دے ذریعے ساکوں 500/-روپیبدلے  نظام الدین ٹیشن تے پچاوݨاں ہا ۔ ٹھیک ترے وڄے رات کوں مجاہدبھٹی سب کوں اُٹھا ݙتا جو ڄلݨ دی تیاری کرو ۔اَڄ تاں ظہور دھریجہ وی ویلے سِر اُٹھے ودّے ہَن ۔ سب سنگتی اُٹھی کھڑوتے ۔ دھاں پاں کے فارغ تھئے ۔ ضروری سمان ‘ کاغذ ‘ پاسپورٹ ‘ ویزے ‘ ریلوے بکنگ دے کاغذ ‘ کیمرے وغیرہ چاتے تے ٹُر کھلوتے ۔ 6:00وڄے ݙو ٹیکسیاں آ ڳیاں ۔ اَساں سمان چا تے تلے آ ڳیوسے تے 6:10اُتّے ٹُر پیوسے ۔ نظام الدین ٹیشن6:50تے پُڄ ڳیوسے۔

گݙی ٹیشن دے پلیٹ فارم نمبر5تے آوݨاں ہا ۔ ہولے ہولے بھیڑ تھیندی ڳئی ۔ ساکوں D3ݙٻے وچ جا ملی ۔ ݙٻے دے ٻاہروں ریزرو لوکاں دے نانواں دی تندیر لڳی کھڑی ہئی ۔ ایہ ہک ایکسپریس گݙی ہئی جِہڑی رات کوں اِتھاں پُڄدی ہے تے اِتھوں سویلے7:10تے ٹُردی تے آگرہ 9:57تے پُڄ ویندی ہے ۔ ساݙیاں ݙہ سیٹاں ریزروہَن ۔ فرید پیرزادہ تے موہن بھگت ساݙے نال نہ آئے ہَن تہوں اَساں اَٹھ بندے ݙہ سیٹاں اُتے مزے نال ٻیٹھے ریہوسے گݙی 7:15تے ٹُر پئی ۔ اساں سمان اُتّے رکھیا تے میں تاکی دے نال ٻہہ تھیئم تاں جو نظارے کریندا ونڄاں۔

اَڄ دا موسم چنڳاں ہا ۔ اَسمان اُتّے بدّل ہَن ۔ ٹھڈی ہوا دیاں ہیلاں گُھلدیاں پیاں ہَن ۔ گݙی ٹیشن توں ٻاہر نکلی ہولے ہولے رفتار ودھیندی ڳئی ۔ ٹیشن اُتّے تاں کئی ٹریک موجود ہَن پر ٹیشن توں ٻاہر گݙی دے چار ٹریک ہَن ۔ اڳوں سارے راہ تے ترے ٹریک ہَن ۔ گݙی ٻونگدی ‘ کُوکڑیاں مریندی ویندی پئی ہئی۔ ریلوے لائن دے نال نال لوک ٻاہر پھردے ودّے ہَن ۔ اصلوں ساݙے مُلخ ‘ آلا نظارہ ہئی ۔ لوک مرد زنانیاں گݙی کوں کنڈ کرکے اپݨیاں مجبوریاں پوریاں کریندیاں پیاں ہن ۔ ٹیشن دے نال دے کچے مکان تے کوارٹر لوکاں دی غریبی دا حال سݨویندے پئے ہن۔ ہک چھت اُتّے میں ہک بندے کوں ہک چھپری تلّے سُتّا ݙٹھا جیندی چھت اوندے سینے کنوں صرف ہک فُٹ اُچّی ہئی تے اوہ کھٹ اُتّے سُتّا پیا ہئی ایں سمجھو جو سُتّیں اوہ گوݙے اُچّے نہ کر سڳداہا بس پاسا ولا سڳدا ہا ۔ ٹیشن دے نال کواٹراں تے جھڳیاں وچ لوکاں دے چھوٹے موٹے کاروباری تے دستکاری دے یونٹ وی نظر آندے ہَن ۔7:33تے پہلا ٹیشن فرید آباد آیا۔وَل بلبھ گڑھ جتھاں گݙی نہ رُکی ۔ وَل پَلوال 8:15 تے آیا اَتے روندھی ‘ بُوجل ‘ ہنجھو نوشوال ٹیشناں توں رُکے مُتّوں گݙی8:58تے متھرا پُڄ ڳئی ۔ راہ وچ ٹیوب ویل ٹریکٹراں نال چلدے پئے ہَن ۔ جتھّوں پتہ لڳدا ہا جو اُتھّاں بجلی کوئنیں ۔ ریلوے لائن دے ݙونہاں پاسوں ساویاں فصلاں دُھم مچائی کھڑیاں ہَن ۔ دھانڄ ‘ مکئی تے چارے دیاں فلاں سِر کڈھی کھڑیاں ہَن ۔ ہُݨ ہولے ہولے دُھپ نکلݨ پئی ڳئی ہئی اَتے ہوا دی خنکی وی بدلدی پئی ہئی ۔متھرا ہندوستان دا پُراݨاں تاریخی شہر ہے ۔ ایہ ریلوے جنکشن ہے ۔ اِتھاں چنڳی بھلی آبادی نظردی ہئی ۔ اِتھوں گݙی9:15تے ٹُر پئی ۔ سارے رستے مِٹّی؍بھوئیں دا رنگ لال ہئی جیویں اساݙے سطح مرتفع دے علاقے وچ پنڈی دے نیڑے تیڑے ہے ۔ ریلوے لائن دے نال گھاہ ٻوٹ ‘ سَر وغیرہ دے آپیں ڄمدیں ٻوٹے وی ہَن اَتے لوکاں دی محنت دا نتیجہ شرینہ ‘ کِکّر تے نِم دے وَݨ وی ۔ اِتھاں پہاڑی کِکرّ زیادہ ہے ۔ جہڑا اساݙے وݨ وانگ گھاٹا کوئنیں ۔ ٻہوں چھدرا تے وَیلا ہے ۔ اُونویں وی سارے ہندوستان وچ میں روایتی وݨ چھدرے اِی ݙٹھن۔ نمائشی ٻوٹے گھاٹے ہِن ۔ البتہ وݨ دا رنگ ہندوستان وچ ٻہوں ساوا ہے ۔متھرا دے نال تیل دیاں ریفائنریاں ہِن۔ متھرا دے ٻاہروں تیل دے کھوہ نظراَئے جنہاں وچوں تیل نکلدا پیا ہا اَتے بھاہ دے لمبے نظردے ہَن ۔ متھرا دے بعد گݙی باد ‘ فرہ ‘ کتھم ‘ دے کچے ٹیشناں توں لنگھی۔9:55تے آگرہ دا پہلا ٹیشن ’’راجہ کی منڈی‘‘ آیا ۔ وَل 10:10تے آگرہ کینٹ آیا ۔ ایہو اَڄ اساݙی منزل ہئی۔

رستے وچ لوکاں نال ڳالھیں تھیاں تاں لوکاں پاکستان سرائیکی چینل ’’کُوک‘‘ دی تعریف کیتی ۔ شئیت ’’کُوک‘‘ دا پروگرام انڈیا وچ نظر آندے ۔ سرائیکی ڄاݨݨ آلے لوک چینل کوں ݙیہدے وی ہِن اَتے ایندے پروگراماں کوں پسند وی کریندن۔

حوالہ

کتاب: دِلّی ڈھائی کوہ۔ مصنف شوکت مغل، چھپیندڑ: جھوک پبلشرز ‘ ملتان