آکھ فرید الف

وسیب دے لوک کتنے وݙے ہِن ، ایندا اندازہ ایں ڳالھ توںتھیندے جو1848 ء ترائے سال دی عمر اچ آپ دے وݙے بھراحضرت خواجہ فخر جہاں آپ کوں اپݨے وݙے بھرا خواجہ تاج محمود کنیں پڑھݨ کیتے ٻلہایا ۔ ملتانی قاعدے دی الفت تے انگل رکھیندے ہوئے خواجہ تاج محمود فرمایا ’’ آکھ فرید الف‘‘ خواجہ فرید جواب اچ آکھیا ’’ آکھ فرید الف ‘‘ خواجہ تاج محمود ترائے واری ایہے الفاظ پھیرے ݙیوائے تے جواب اچ وی خواجہ فرید وی آکھ فرید الف اکھیندے ریہے ۔ اے سُݨ تے حضرت خواجہ فخر جہاں اتے بیٹھے ہوئے لوکیں تے وجد طاری تھی ڳیا ۔ اللہ آلیں دی محفل ہئی،ڳالھ ملتانی قاعدے دی الف توں اللہ دی الف تئیں پُڄ ڳئی تے اللہ آلیں دی محفل ݙاڈھی تھی ڳئی۔ خواجہ فرید ایہو سبق جوانی اچ وی یاد رکھیا تے شاعری اچ وی جاہ جاہ فرمایا :۔

الف ہکو ہم بس وے میاں جی

ہور کہانی مول نہ بھاݨی

الف ڳیوم دم کھس وے میاں جی

اٹھ سال دی عمر اچ حفظ اے وی ہک تریخی واقعہ ہے ، جو ’’ آکھ فرید الف ‘‘ آلے کوں پڑھاکو ٻال چھڑا اٹھ سال دی عمر اچ نہ صرف قرآن مجید حفظ کیتا ،بلکہ ٻہوں ساری دینی تعلیم وی سِکھ گھدی۔حضرت خواجہ غلام فرید دی عمر اجٖݨ چار سال ہئی تاں آپ دی اماں سیݨ جھوک لݙا ڳئی ۔ اٹھ سال دے تھئے تاں ابا سئیں وی اللہ کوں پیارے تھی ڳئے ۔ انہاں دی فوتگی دے بعد وݙے بھرا خواجہ فخر الدین عرف فخر جہاں سجادہ نشین بݨئے ۔ انہاں دی اولاد نہ ہئی انہاں خواجہ فرید کوں اپݨا پُتر بݨا گھدا تے انہاں خواجہ فرید دی تعلیم، تربیت سانبھ اولاد توں ودھ تے کیتی تے اناہں کوں یتیمی دا احساس نہ تھیوݨ ݙتا۔

حوالہ

کتاب: میݙی دھرتی، میݙے لوک ، مصنف: ظہور احمد دھریجہ ، ناشر: جھوک پبلشرز ، ملتان ، 2018ء