آنندمئی ماں

آنندمئی ماں (30 اپریل 1896ء – 27 اگست 1982ء) بنگال، ہندوستان دی روحانی رہنما ہَئی۔ شیو آنند سرسوتی انّھاں کوں ”ہندوستانی مٹی دا کامل ترین پھول“ قرار ڈِتّا ہَئی۔ آنندمئی دے پیروکار انّھاں کوں پیش بین، جھاڑ پھونک دے ذریعے علاج کرݨ آلی تے معجزے کرݨ آلی سمجھدے ہَن۔ پرم ہنس یوگانند نے سنسکرت خطاب ”آنندمئی“ دا ترجمہ انگریزی وچ ”Joy-permeated“ کِیتا جیڑھی اردو وچ ”خوشی نال سرشار“ ہے۔ 1920ء وچ انّھاں دے عقیدت منداں ایہ ناں انّھاں دی خدائی خوشی دی جاودانی حالت کوں بیان کرݨ کِیتے ڈِتّا ہَئی۔

ابتدائی زندگی

آنندمئی دا پیدائشی ناں ”نرملا سُندری دیوی“ (নির্মলা সুন্দরী؛ نرمولا شُندری، اردو: "معصوم حسین دیوی") ہَئی۔ نرملا دی پیدائش 30 اپریل 1896ء کوں برہمنباریا ضلع دے گاؤں کھیورہ (موجودہ بنگلہ دیش) دے کٹر ویشنوی براہمن جوڑے ”بیپِن بھٹاچاریہ“ تے ”موکشدا سندی دیوی“ دے ہاں تھئی ہَئی۔ انّھاں دے والد دا درحقیقت تریپورہ دے ویدیکات نال تعلق ہَئی، اوہ ہک ویشنوی نغمہ پرداز ہَن تے بھگوان وشنو نال گہری عقیدت رکھݨ دی وجہ نال مشہور ہَن۔ ماں پیو ڈُون٘ہاں دا تعلق نامی گرامی خانداناں نال ہَئی اِتّوں وی اوہ غربت دی حالت وچ ہَن۔ نرملا لگ بھگ ݙو سال تک گاؤں دے اسکول گئی ہَن۔ انّھاں دے اساتذہ انّھاں دی صلاحیت نال خوش ہَن، انّھاں دی ماں اپݨی بیٹی دی دماغی وڄدی ہوئی قوت دی وجہ نال پریشان ہَئی کیونکہ انّھاں دا برتاؤ بے پروا تے شاد ہَئی۔ جݙݨ نرملا دی ماں ہک دفعہ شدید بیمار تھی گئیں تاں قریبی رشتے دار وی بچی دی بے پروائی ݙیکھ تے حیران تھئے۔

1908ء وچ دیہی رسوم دے تحت 13 سال دی عمر وچ انّھاں دی شادی وکرم پور دے رامنی موہن چکرورتی نال تھئی، بعد وچ آنندمئی نے شوہر کوں ”بھولا ناتھ“ دا ناں ڈِتّا ہَئی۔ شادی دے بعد اوہ جیٹھ دے گھر وچ پنج سال تک رہیں، اوہ گھریلو کم نہ کریندی ہَن تے زیادہ تر وقت دھیان (مراقبہ) دی حالت وچ ہوندی ہَن۔ انّھاں دے ہک دیندار پڑوسی ہرکمار (جو ہک مجنون تے دیوانہ ہَئی) نے انّھاں کوں ”روحانی فوقیت“ والی آکھیا، انّھاں کوں ”ماں“ آکھݨ شروع کر ݙِتّا تے صبح توں پہلے تے شام وچ انّھاں دی انکسار نال تعظیم کرݨ شروع کر ݙِتّا۔

جݙݨ نرملا 17 سال دی تھئیں تاں اوہ اپݨے شوہر دے نال رہݨ کِیتے گئیں۔ انّھاں دا شوہر اشٹ گرام وچ کم کریندا ہَئی۔ 1918ء وچ اوہ ڈُون٘ہاں باجت پور چلے گئے تے اتھاں 1924ء تک رہے۔ انّھاں ڈُون٘ہاں دے وچ کوئی جنسی رشتہ نہ ہَئی، جݙݨ وی انّھاں دا شوہر رامنی جنسی رشتہ قائم کرݨ چاہندا ہَئی تاں نرملا دے جسم وچ موت دی خصوصیات ظاہر تھیوݨ شروع تھی ویندی ہَن۔

ڈھاکہ

1924ء وچ اوہ اپݨے شوہر دے ہمراہ شاہ باغ چلی گئیں جتھاں انّھاں دے شوہر کوں ڈھاکہ دے نواب دے باغات دے محافظ دی نوکری ملی۔ ایں عرصے دے دوران نرملا کیرتناں وچ جایا کریندی ہَن۔[[:ur:فائل:Anandamayi_Ma_--_painting.jpg|]]

جیوتش چندر رائے المعروف ”بھائی جی“ انّھاں دے پہلے تے قریبی مرید ہَن، اوہ پہلے شخص ہَن جنّھاں نرملا کوں ”آنندمئی ماں“ یعنی ”خوشی نال سرشار ماں“ آکھیا۔ جیوتش چندر رائے دا 1929ء وچ آنندمئی ماں کِیتے رمنا دے کالی مندر دی حدود وچ آشرم تعمیر کرݨ وچ انتہائی اہم کردار ہَئی۔

1926ء وچ آنندمئی نے سدیشوری علاقے دے سابقہ متروکہ قدیم کالی مندر کوں دوبارہ بحال کِیتا۔

وفات

آنندمئی ماں آشرم, ہردوار (کنکھل)

آنندمئی ماں آشرم, ہردوار (کنکھل) آنندمئی ماں نے 27 اگست 1982ء کوں دیہرا دون وچ وفات پائی تے بالآخر 29 اگست 1982ء کوں انّھاں دی سمادھی (مزار) تعمیر کیتی گئی۔ انّھاں دی سمادھی ہردوار، شمالی ہندوستان وچ واقع انّھاں دے کنکھل آشرم دے صحن وچ ہے۔