آصف سیال

کجھ لوک ایجھے وی ہوندن جنہاندی سوچ ، فکر تے علم زباناں تے تہذیباں دے وچاڳ پُل بݨیندن تے وہندے دریا وانگوں سوچ دے وݙے وݙے درمݨ آباد تے شاد کر ݙیندن ’’دیرہ پھلاں دا سہرا‘‘ دا ہک شخص آصف سیال ایویں ہے ۔ آصف بنیادی طور تے انجینئر ہے ، سائنس دا طالب علم ہے ، ہے تاں سائنسدان پر میں طالب علم ایں سانگے لکھیے جو او آپ کوں آپ طالب علم اَکھویندے ، میں ہمیشہ ݙٹھے جو سائنس آلے ہمیشہ فارمولے یا ݙویا ݙو چار دی گاٖلھ کریندن ، پہلا شخص ہے جیڑھا تہذیب ، ثقافت تے جغرافیے دی گاٖلھ کریندے ، مٹی اوندی خوشبو تے مٹی دی محبت دی گاٖلھ کریندے ۔ دھرتی ، دھرتی دے وَݨ ، وݨیں دے ٻور، ٻوریں دی خشبو تے انہاندے پُھل ، پھل دی گاٖلھ کریندے ، اپݨی مٹی ، اپݨے وسیب ، اپݨے لوک تے اُنہاندی ماء ٻولی دی گاٖلھ کریندے ، ٻولی تے ٻولی دے مٹھاج دی گاٖلھ کریندے ، سرائیکی زبان تے سرائیکی زبان دے دان خان دی گاٖلھ کریندے ، او آکھدے سرائیکی ماء ہے ، سندھ وادی دی اصل ہے ، خطے دیاں اکثر زباناں ایندے وچوں پیدا تھئین ، کجھ پوندے پناہ گیریں آلی کار ٻاہروں آئن۔

حوالہ

کتاب: میݙی دھرتی، میݙے لوک ، مصنف: ظہور احمد دھریجہ ، ناشر: جھوک پبلشرز ، ملتان 2018ء