آصفہ بھٹو زرداری

آصفہ بھٹو زرداری
معلومات شخصیت
پیدائش	(1993-02-03) 3 فروری 1993 کراچی
قومیت	پاکستانی
جماعت	پاکستان پیپلز پارٹی
والدین	آصف علی زرداری بے نظیر بھٹو
پیو	آصف علی زرداری
ماء	بینظیر بھٹو
بہن/بھائی	بلاول بھٹو زرداری ،  بختاور بھٹو زرداری
خاندان	زرداری خاندان بھٹو خاندان
مناصب
خاتون اول پاکستان
آغاز منصب 12 مارچ 2024
رکن قومی اسمبلی
رکنیت سنہ 15 اپریل 2024
حلقہ انتخاب	حلقہ این اے۔213
عملی زندگی
مادر علمی	اوکسفرڈ بروکس یونیورسٹی یونیورسٹی کالج لندن
پیشہ	سیاسی اور سماجی کارکن
ویب سائٹ
ویب سائٹ

آصفہ بھٹو زرداری پاکستان دی سب توں وݙی تے جمہوری پارٹی پاکستان پیپلز پارٹی دے سیاسی ٹٻر نال تعلق رکھݨ آلی ہن۔ اوہ 3 فروری 1993ء کوں ڄمی ہن۔ آصفہ بھٹو زرداری پاکستان دی سابق وزیراعظم محترمہ بے نظیر بھٹو شہید تے سابق صدر آصف علی زرداری دی سب توں نکی دھی ہن۔ اوہ بلاول بھٹو زرداری تے بختاور بھٹو زرداری دی چھوٹی بھیݨ ہن۔ آصفہ بھٹو زرداری پاکستان پیپلز پارٹی دے بانی شہید ذوالفقار علی بھٹو تے ایرانی نژاد نصرت بھٹو دی ݙوہتری تے شاہنواز بھٹو تے مرتضیٰ بھٹو دی بھڑینجی ہن۔ آصفہ بھٹو زرداری حاکم علی زرداری دی پوہتری تے پاکستان قومی اسمبلی دی رکن عذرا فضل پیچوہو تے فریال تالپور دی بھتریجی ہن۔ انہاں دا ناں انہیں دے پیو آصف علی زرداری نے رکھیا ہئی۔ انہیں دی ماء بے نظیر بھٹو شہید انہیں دا کوئی ٻیا ناں رکھݨ چاہندی ہن۔ ایہہ اپݨے پیو دے سب توں نیڑے رہی ہن، آصف علی زرداری دے جیل دے ݙیہاڑیاں وچ تے عدالتاں وچ پیشی دے ویلے وی آصف علی زرداری دی جھولی وچ ہمیشہ اوہی نظر آندی ہائی۔ ایہو وجہ ہے جو اڄ وی آصفہ بھٹو زرداری اپݨے پیو دی سب توں چاہیتی تے لاݙلی دھی ہن۔

تعلیمی سفر

آصفہ بھٹو زرداری نے آکسفورڈ بروکس یونیورسٹی توں سیاسیات تے سوشیالوجی وچ بیچلر کیتا۔ جولائی 2016ء وچ آصفہ بھٹو زرداری نے گلوبل ہیلتھ اینڈ ڈویلپمنٹ وچ ماسٹرز دی ڈگری یونیورسٹی کالج لندن توں حاصل کیتی۔ ایں حوالے نال لندن کالج وچ منعقد تقریب وچ انہاں دے پیو آصف علی زرداری، انہیں دے بھرا تے پاکستان پیپلز پارٹی دے چیئرمین بلاول بھٹو زرداری تے انہیں دی وݙی بھیݨ بختاور بھٹو زرداری نے شرکت کیتی۔

طالب علمی دے دور توں ہی انہاں نے مختلف سیاسی، سماجی سرگرمیاں وچ حصہ ڳھنݨ شروع کر ݙتا ہئی، انہاں نے جانوراں دے حقوق دے حوالے نال سرگرمیاں وچ حصہ ڳھدا تے پاکستان کوں پولیو توں نجات ݙیوݨ دے کیتے سب توں ڳھٹ عمر پولیو توں محفوظ پاکستان دی سفیر منتخب تھئین۔

ابتدائی دور

آصفہ بھٹو زرداری ہک سیاسی ٹٻر نال تعلق رکھݨ دے نال نال ملک وچ درپیش جمہوری دشمنیں دے بے تحاشا ظلم ستم دی شکار تھئین۔ بچپݨ ہی توں سیاسی مخالفین دی جانب توں انہیں دی ماء محترمہ بے نظیر بھٹو شہید تے سابق صدر آصف علی زرداری دے خلاف کیتے ونڄݨ آلیاں کوڑے ہتھکنڈیاں نے انہیں دے بچپݨ کوں متاثر کیتا۔ اوہ نوعمری دے دور وچ عدالتیں تے جیل دیاں کال کوٹھڑیاں تے احتجاج وچ اپݨی ماء دے نال شریک رہیاں۔ پے در پے رکاوٹیں تے سیاسی انتقام دے باعث انہاں دا بچپن کݙاں جوانی وچ تبدیل تھیا، وقت نے سمجھݨ ہی نہ ݙتا۔

بے نظیر بھٹو دی آصفہ نال محبت

بے نظیر بھٹو آصفہ نال ٻہوں پیار کریندیاں ہن۔ اوہ اکثر اپݨے انٹرویوز دے دوران ٻچیں کوں اپݨے نال رکھدی ہن۔ ہک انٹرویو دے دوران بی بی توں سوال پچھیا ڳیا، پر جواب ننھی آصفہ دی جانب توں آیا جیندے تے سارے کھل پئے۔ بے نظیر بھٹو اکثر آھدی ہن جو "آصفہ بھٹو باتونی تے سمجھدار ہے۔" بلاول تے بختاور جݙاں کھیݙ وچ مصروف تھیندے ہن تاں آصفہ اپݨی ماء دے اردگرد رہندی ہائی تے سیاست دے موضوع تے تھیوݨ آلی ڳالھ مہاڑھ کوں ٻہوں غور نال سݨدی ہائی۔ بے نظیر بھٹو ٻچیں دے کیتے سپیشل کھاوݨا وی تیار کریندیاں ہن جو آصفہ کوں ٻہوں پسند ہئی۔ بقول آصفہ، بی بی اکثر سوچیندی ہائی جو جلاوطنی توں ٻچیں کوں وقت ݙیوݨ دا موقع مل ڳیا ہے۔ آصفہ دے بچپݨ وچ اپݨی ماء نال قربت ہی اڄ انہیں دے سیاسی شعور دے پختہ تھیوݨ دی دلیل ثابت تھئی ہے۔

بے نظیر بھٹو دی وفات

آصفہ بھٹو زرداری 14 سال دی ہن جݙݨ انہیں دی ماء ہمیشہ ہمیشہ دے کیتے انہیں توں جدا تھی ڳئین۔ دسمبر 2007ء کوں محترمہ بے نظیر بھٹو راولپنڈی دے لیاقت باغ وچ جلسہ کر کے واپس ویندی پئیاں ہن تاں انہیں تے قاتلانہ حملہ تھیا تے اوہ شہید تھی ڳئین۔ آصفہ دے مطابق "بی بی شہید دے خون نے ملک وچ جمہوریت دی آبیاری کیتی ہے۔" انہاں کوں علم ہئی جو پاکستان وچ انہاں دی جان کوں خطرہ ہے پر انہاں نے ساکوں دبئی بھیڄ ݙتا تے خود عوام دے حقوق دی جنگ لڑݨ دے کیتے پاکستان پہنچ ڳئین حالانکہ انہاں کوں آگاہ کیتا ڳیا ہئی جو اوہ ملک واپس نہ ونڄن پر انہاں نے پروا نہ کیتی تے ملک واپس آئین تاکہ اپݨی سیاسی جدوجہد کوں نویں سرے توں آغاز کر سڳن۔ ایں طرح انہاں نے اپݨا خون وطن تے نچھاور کر ݙتا۔ دنیا دی سیاسی تاریخ وچ ایویں کوئی ٻئی مثال کائنی۔ اوہ بھٹو شہید دے مشن کوں جاری رکھݨ چاہندیں ہن تے اڄ ساݙا ایہ عہد ہے جو اساں اپݨے خاندان دی کہیں قربانی کوں رائیگاں نہ ونڄݨ ݙیسوں۔

عملی سیاست دا آغاز

آصفہ بھٹو زرداری دوران تعلیم ہی سیاست دے میدان وچ سرگرم رہی۔ اوہ جیہڑے ماحول وچ پلی ودھی اوہ ہر پاسے توں سیاست داناں تے حکومتی عمائدین نال ڳھریا رہندا ہئی۔ بلا شبہ بھٹو خاندان نے ایں ملک دی سیاست وچ فعال کردار ادا کیتا ہے۔ آصفہ سیاست کوں زندگی توں کݙھ نہ سڳی، انہاں دی سوچ ہے جو اوہ جݙاں خود کوں عوام دی خدمت دے قابل سمجھسی تاں عملی طور تے سیاست دے میدان وچ قدم رکھ ݙیسی۔ اڄ کل انہاں دی توجہ مسائل نال دوچار جنہیں شعبیاں دی طرف ہے انہاں وچ صحت تے انسانی حقوق دے شعبے اہم ہن۔

کجھ ݙیہاڑے پہلے ایہ خبر وی گردش کریندی پئی ہئی جو آصفہ بھٹو زرداری نے سیاسی میدان وچ قدم رکھ ݙتا ہے، سندھ دے معاملات ݙیکھݨ شروع کر ݙتے ہن، آئندہ انتخابی مہم وچ اوہ سندھ دا محاذ سنبھلیسن۔ بلاول بھٹو زرداری توں خورشید جونیجو دی ملاقات وچ اوہ وی موجود ہن جینکوں سامݨے رکھ تے ایہ قیاس کیتا ڳیا۔

ہک مشکل دور دی یاد

آصف علی زرداری جݙاں صدر پاکستان ہن تاں اوہ ایوان صدر تے وزیراعظم ہاؤس وچ تھیوݨ آلیاں تمام اہم سرگرمیاں وچ آصفہ بھٹو کوں شریک کریندے ہن۔ آصفہ بھٹو دے کیتے اوہ ٻہوں ہی خوفناک ویلا ہئی، جݙاں اوہ ترائے سال دی ہن تاں انہیں دے پیو جیل وچ ہن تے جݙاں اوہ یارہ سال دی تھئین تاں پیو کوں جیل توں رہائی ملی۔ ایہ سارا وقت انہیں دے کیتے ٻہوں صبر آزما ہئی۔

بختاور تے بلاول

آصفہ، بلاول تے بختاور بھٹو دا سیاسی نکتہ نظر ہمیشہ ہکو جیہاں رہیا ہے۔ اوہ ڄاݨدین جو انہیں دے نانا شہید ذوالفقار علی بھٹو نے جیہڑا مقصد حاصل کرݨ دے کیتے اپݨی جان دی قربانی ݙتی، اوہ ٻہوں عظیم مقصد ہے تے آصفہ ایں حصول دی جدوجہد وچ مصروف ہن۔ بلاول بھٹو زرداری دے نال اکثر سیاسی میٹنڳاں وچ آصفہ دی موجودگی ایں ڳالھ دی دلیل وی ہے۔

تریمتیں دے خلاف جرائم وچ اضافہ

آصفہ بھٹو زرداری ملک وچ تھیوݨ آلیاں تریمتیں دے خلاف جرائم وچ اضافے دے باعث وی اکثر پریشان ہن۔ اوہ سوشل میڈیا تے وی تریمتیں تے تھیوݨ آلیاں ظلمیں دی بھرپور مذمت کریندین۔

پولیو مہم دا آغاز

آصفہ بھٹو زرداری سیاسی ٹٻر پاکستان پیپلز پارٹی نال تعلق رکھݨ دے نال نال ہر پلیٹ فارم تے پاکستان دی نمائندگی کریندیاں نظر آندین۔ انٹرنیشنل ہیومن رائٹس فارم ہووے یا انٹرنیشنل ہیلتھ پروگرام، اوہ پاکستان تے عوام بالخصوص آوݨ آلی نسل دے کیتے ہمیشہ فکر مند رہندین۔ جݙاں ملک وچ پولیو دے مرض دی خطرے دی گھنٹی وڄی تاں ایندے خلاف محترمہ بے نظیر بھٹو نے آصفہ بھٹو زرداری کوں سب توں پہلے پولیو ویکسین دے قطرے پلائے تے جݙاں ایہ ٻچی ماء دی آغوش توں نکل کے جوانی وچ داخل تھئی تاں اقوام متحدہ نے ایں ٻچی آصفہ بھٹو زرداری کوں پولیو دے خلاف جنگ وچ اپݨا سفیر تعینات کیتا۔

آصفہ بھٹو نے 2007ء وچ پاکستان وچ پولیو مہم دی ذمہ داری نبھیندے ہوئے ملک وچ 70 فیصد پولیو ویکسینیشن دا کم اپݨی زیر نگرانی مکمل کروایا تے اڄ تک ایں مشن دی طرف گامزن تھیندے ہوئیں پاکستان کوں پولیو فری ملک بݨاوݨ دی خواہش وچ مصروف عمل ہن۔ 2010ء وچ پاکستان وچ آوݨ آلے سب توں وݙے سیلاب وچ متاثرین دی مدد تے انہیں دی بحالی دے کیتے ݙینہاں راتیں ہک کر کے آصفہ بھٹو زرداری سمیت اوں ویلے دے صدر آصف علی زرداری، چیئرمین بلاول بھٹو زرداری سیلاب زدگان دے نال رہے تے انہیں دی بحالی تے غذائی اجناس دی کمی کوں جلد از جلد مکمل کر تے انہیں دے نقصان کوں پورا کر کے انہیں کوں باعزت جیوݨ دا حق فراہم کیتا۔ آصفہ بھٹو زرداری دا طرز سیاست اپݨی ماء شہید محترمہ بے نظیر بھٹو دی عکاسی کریندے۔ اوہ ملک پاکستان دیاں تریمتیں تے خاص طور تے ٻچیں دی نگہداشت دے کیتے ہمیشہ فکر مند رہندین۔ ایں سلسلے وچ سندھ دے ہسپتالیں دا دورہ ہووے یا شہر وچ صفائی ستھرائی دا کم یا تعلیم تے صحت دیاں سرگرمیاں اوہ ہمیشہ ودھ چڑھ کے حصہ ڳھندین۔

آصفہ بھٹو زرداری دی شادی دی خبر

آصفہ بھٹو زرداری دی شادی دے حوالے نال ایہ خبر ہئی ڄو دخترِ مشرق محترمہ بینظیر بھٹو شہید تے سابق صدر آصف علی زرداری دی دھی آصفہ بھٹو زرداری دا راولا کوٹ نال تعلق رکھݨ آلے سابق اعلیٰ افسر سردار الطاف دے پتر نال رشتہ طے تھی ڳیا ہے تے او ݙوہیں برطانیہ وچ ہک ٻئے دے نال تعلیم ڳھندے ہن۔ ݙوہیں دی خواہش کوں سامݨے رکھݨ دے نال خاندان دے وݙیاں نے اصولی طور تے رشتہ طے کرݨ دا فیصلہ کر ڳھدا ہئی، پر ایہ خبر پاݨی دا بلبلہ ثابت تھئی تے صرف اخبارات دی زینت بݨ کے رہ ڳئی۔

آصفہ دا ووٹ رجسٹرڈ

2013ء وچ آصفہ بھٹو زرداری دا ووٹ سندھ دے ضلع ٹنڈوالہیار وچ رجسٹرڈ تھیا۔ قومی اسمبلی دے حلقے این اے 223 دی یونین کونسل جھنڈو مری وچ ایہ ووٹ رجسٹرڈ تھیا۔ ایں موقع تے انہیں دی ٻوا فریال تالپور تے صوبائی وزیر اطلاعات شرجیل انعام میمن وی آصفہ بھٹو دے نال ہن۔ آصفہ بھٹو زرداری ٹنڈوالہیار کوں اپݨا ݙوجھا گھر سمجھدی ہن۔ ایں حلقے توں انہیں دی ماء ݙو دفعہ رکن قومی اسمبلی منتخب تھئے ہن۔

آصفہ دی انوکھی سالگرہ

3 فروری 2009ء کوں آصفہ بھٹو زرداری دی سالگرہ دے موقع تے سندھ اسمبلی وچ باقاعدہ قرارداد منظور تھئی۔ صوبائی وزیر اطلاعات شازیہ مری نے صدر پاکستان آصف علی زرداری تے بے نظیر بھٹو دی نکی دھی آصفہ بھٹو زرداری دی سالگرہ دے حوالے نال مبارکباد دی قرارداد ایوان وچ پیش کیتی جینکوں ایوان نے متفقہ طور تے منظور کر ڳھدا تے ایویں جݙݨ جݙݨ سندھ اسمبلی دی کارروائی دی تاریخ پڑھی ویسی تاں آصفہ بھٹو زرداری دا ناں وی جگمگانداݙکھائی ݙیسی۔

آصفہ بھٹو دیاں کامیابیاں

آصفہ بھٹو زرداری پاکستان وچ صحت دے حوالے نال خاصی سرگرم رہی ہن۔ روٹری دی سفیر تے پولیو دی روک تھام دے حوالے نال اقوام متحدہ دی سفیر وی رہی ہن۔

اوہ پہلی کم عمر پاکستانی ہن جنہاں نے پولیو دے خاتمے دے حوالے نال اقدامات کیتے۔ انہیں دی ماء محترمہ بے نظیر بھٹو نے 1994ء وچ وݙے پیمانے تے ٻچیاں وچ حفاظتی ٹیکییں دے حوالے نال کم کیتا ہئی۔

2013ء وچ آصفہ نے فلپائن وچ سمندری طوفان دے متاثرین دے حوالے نال چندہ کٹھا کرݨ دی غرض نال 13 ہزار فٹ دی بلندی توں پیراشوٹنگ وی کیتی۔

سیاسی سرگرمیاں

اوہ سوشل میڈیا دے ذریعے پاکستان دی سیاست توں باخبر رہندیاں ہن تے سیاست تے تبصرہ وی کریندیاں ہن۔

اپݨی مدد تے رہنمائی نال پاکستان وچ صحت دے شعبے کوں بہتر بݨاوݨ انہاں دا خواب ہے تے اوہ ایں حوالے نال پاکستان دے مختلف صحت دے شعبیاں دا دورہ وی کریندیاں رہندیاں ہن۔

صفائی ستھرائی دے حوالے نال انہاں نے گذشتہ سال کراچی دے علاقے لیاری وچ مہم دا آغاز کیتا۔