آساں تے اُمیداں

نواں سال آوے تاں نویاں آساں تے امیداں پیدا تھیدین جیویں 2018ء شروع تھئے ،اساں سمجھے ایں سال صوبہ بݨ ویے ،وسیب سانگے سی ایس ایس دا کوٹہ مقرر تھی ویسے ‘اساݙا اپݨا الگ ہائی کورٹ اساݙے وسیب دے ٻال جج بݨسن ،ہائی کورٹ دے نویں بنچ بݨسن ،وسیب ءِ چ سپریم کورٹ دا بنچ بݨسے ،این ایف سی ایوارڈ ملسے ،لکھاں ملازمتاں پیدا تھیسن ،بے روزگاریں کوں روز گار ملسے ،اسیݙے ٻال لاہور ،کراچی اسلام آباد بلوچستان تے افغانستان دے ڈیتھ زون نوکریان کرݨ دے بجائے اپݨے گھر ءِ چ ملازمتاں کریسن مزبان تے ثقافت دے ادرے بݨسن اساݙا کوئی شاعر ادیب تے دانشور سکالر صحافی بکھ ݙکھ تے بیماری توں نہ مرسی ،وسیب ءِ چ غربت توں خودکشیاں نہ تھیسن ‘ پر سال مکݨ آلا ہے ‘ ݙھ نی مُکے ،خوشییں دا ویلھا نہ آیا صوبہ نی بݨیا ،حاکمیں وسیب دے لوکیں کوں صوبہ ݙے تے کٹھا کرݨ دی جاہ تے پھیٹے ودھوا ݙتن ،کہیں ویلے محمد علی درانی تے جہیں ویلے چوہدری طارق بشیر چیمہ ،وسیب کوں میر جعفر تے میر صادق نک تے لڑ ڳن ،پر ظلم کے تو ݨیں ؟ کے توݨیں ؟ آلے سوال دے اندر ہک ٻیا سوال وی ہے جو رنجیت سنگھ دے قبضے (2جون1818ء ) کوں ݙو صدیاں وہا ڳن ، پاکستان بݨیے کوں وی 70سال تھی ڳن کے تئیں صبر کروں؟2018ء نوان سال شروع تھیا ہا تاں اسان آکھیا ہا جو اساں جدوجہد کریسوں ،وسیب ءِ چوں ݙکھ بکھ تے بیماری دے خاتمے کیتے کیا اسں ایویں کیتے ؟ اپݨے گریبان ءِ چ جھاتی پائون ، اپݨے آپ توں پچھوں ۔ اساں آکھیا ہا جو اساں اپݨی  آوݨ آلی نسل کوں اوندا مستقبل تے نویں آوݨ آلے وقت سانگے آس امید دے پھل ݙیسون ،سوال اے ہے وسیب دی نسل کوں فیوچر ملیے یا کھسیا ڳے ؟ اساں سمجھا ہا نویں حکومت آئوسے تے وسیب وی تبدیل تھی ویسے پر وسیب دے چہریں تے تبدیلی تاں آئی اے پر مایوسی دی شکل ءِچ وسیب کوں ریلف دی جاہ تے تکلیف ملی اے ۔جتھاں ݙکھ بکھ تے بیماری ودھ ونجٖے ،بے روزگاری ہووے ،مہانگ تے افراط زر ہووے اتھاں انسانی جنس دا ݙکھ ڈھ ویندے تے طوطو فال آلییں دا کاروبار چمک ویندے ،وسیب ءِ چ ایہو کجھ نظر امدا پے ، ملک دے اصل تے طاقتور حکمرانیں صوبہ محاذ بݨوایا صوبہ دا نعرہ لوایا ،آس ٻد ھیج ڳی جو ہݨ صوبہ بݨ ویسے ،نعرے تے ووٹ مل ڳے ،کامیابی تھی گی ،حکومتاں بݨ ڳیاں ،ول چپ کیوں ؟ اے سوال کھادی ویندے ،کیا نعرہ لواوݨ آلے پچھیتے تے تھی ڳن یا ؟ نویں سال ءِ چ اساکوں وݙے خاب ݙکھائے ڳے ۔آپ کو آ اسں جگ جہاں دے معتبر تے معزز نظر آوݨ لڳے۔اساں دھرتی دا وݨ بݨیے ٻیٹھے ہاسے اکھ کھلی تاں اساڈے دھرتی تے پیر کائناں ہن ،کیا ایندا ناں تبدیلی ءِ؟وسیب ءِ چ لوک خودکشیاں کریندے پن ،لوک بکھ ݙکھ تے تریھ توں مردے پن ،تونسے ءِ چ بکھ دی ݙیݨ پل پل ٻچے ݙیندی پی اے ،تونسے دے وزیر اعلیٰ آکھے لاہور ءِ چ بسنت منائو ،پتنگاں اُڈائو ،خوشیاں کرو تے جشن منائو ۔نویں سال آوݨ تے اساں سمجھیا ہا جو حکومت وسیب ءِ چ اونویں ادبی ادارے بݨیسے جیویں سندھ پنجاب ءِ چ ہن ،سرائیکی کتاباں چھپسن تقریباں تھیسن پلاک آنگے سلاک بݨسے پر تھیا اے جو سرائیکی وسیب دے کروڑیں دا حصہ لاہور دا پنجابی ادرہ پلاک کھا ڳے ۔وسیب دت شاعر ادیب تے گلوکار بیمار ہن ۔اپیلاں کر کر تھک ڳیوں سرکور کجھ ݙیوݨ سانگے تیار کنھی ،کوئی تبدیلی نی آئی ،چہرے بدل ڳن تخت لاہور دا نظام اوہو دا اوہو ہے ،تخت پشور کوں ݙیکھوں تاں اساݙے ٹانک دیرہ اسماعیل خان دے سرائیکی بھرا اتھاں توں وی زیادہ عذاب وات ءِ ن سوال اے ہے جو تبدیلی کݙاں آئو سے ،وسیب دی حالت کݙاں بدسے ،وسیب دے لوکیں کوں حق حقوق کڈاں ملسن ؟ ظلم کڈاں مکسے ؟ شئت ایندا ولدا اے ہے ’’ جے تئیں ظلم سہندے رہسوں تھیندا رہسے ۔

حوالہ

کتاب: میݙی دھرتی، میݙے لوک ، مصنف: ظہور احمد دھریجہ ، ناشر: جھوک پبلشرز ، ملتان 2018ء