آدم واہݨ
آدم واہݨ ضلع لودھراں دی تحصیل لودھراں دا پُراݨا قصبہ دریائے ستلج دے کھٻے پاسے اُچاڑ تے واقع ہے۔ دریائے ستلج دے ایمپرس برج توں تقریباً ݙڈھ میل دے فاصلے تے ہے۔ لاہور توں کراچی ونجٖݨ آلی شاہراہ ایندے نالوں لنگھدی اے۔ پچھلے کجھ سالیں اچ ضلع کونسل ملتان ریلوے اسٹیشن آدم واہن دے نیڑے شاہراہ تے ہیڈبرج تعمیر کیتا ہے تے پُراݨا ریلوے پھاٹک بند کر ݙتے۔ کراچی تے ملتان دے وِچکار ریل گاٖڈی دا اجراء 1878ء اچ تھیا۔لہٰذا ریلوے اسٹیشن آدم واہݨ دی تعمیر 1878ء توں پہلے تھئی ہوسی۔اوں ویلھے آبادی تقریباً ݙو ہزار نفوس دے لڳ بھڳ ہوسی۔ اہل ہنود دی ہک پُراݨی مڑھی (نِکڑا مندر) بھنی سڑک تے خراب حالت اچ موجود ہے۔ نواب محمد بہاول خا ن عباسی اول متوفی (1750ئ) بانی ریاست بہاول پور نے اپݨی رہائش کیتے تعلقہ آدم واہن دا استمراری پٹہ دیوان کوڑامل صوبیدار ملتان توں 1748ء اچ حاصل کیتا تے ایں سال شہر بہاولپور دی بنیاد دریائے ستلج توں جنوب آلے پاسے ترائے میل دے فاصلے تے رکھی۔ ریاست بہاولپور دے او علاقے جیڑھے جو دریائے ستلج دے پار ہن، جنہاں اچ آدم واہن وی شامل ہا، رنجیت سنگھ دے جنرل ونٹورا نے 1840ء اچ فتح کر تے ٻہوں ظلم وسائے۔ اتھاں دے لوکیں رنجیت سنگھ دے ظلم دے سامھے سر نہ نوایا ، آدم واہݨ بہاولپور توں اٹھ کلومٹر دے فاصلے تے ہے ۔
حوالہ
[لکھو | ماخذ وچ تبدیلی کرو]کتاب: میݙی دھرتی، میݙے لوک ، مصنف: ظہور احمد دھریجہ ، ناشر: جھوک پبلشرز ، ملتان 2018ء