آخر اے ڈیفنس ہے
شیدو ہک غریب گھر دا ٻال ہا۔ اوکھیں سوکھیں اپݨے علاقے وچوں چوݙاں پڑھ تے ہک وݙے شہر دی ہک یونیورسٹی وچ داخلہ ونڄ گِدھا۔ شیدو دا رنگ چِٹا ، چہرہ گول ، قد لمبا ، اَکھیں موٹیاں ، جسم بھرواں ہا۔ ذہین ݙاڈھا ہا۔ شریف ݙاڈھا ہا، اَلاوݨ وچ تمیزہئی ، دھیمی گفتگو کریندا ہا۔ یونیورسٹی ونڄ تے اُوں اپݨے آپ کوں ڈھیر چنگا بݨا گِدھا۔ ٹیوشناں وغیرہ پڑھا تے کپڑے وی اچھے کر گِدے۔ ہݨ کجھ نہ کجھ اُوں شہری طرز سِکھ گِدھی۔ کجھ پڑھ ونڄݨ تو ں بعد اُونکوں ایں ڳالھ دا احساس تھیا جو اگر او افسر بݨ ڳیا تاں شادی واسطے اوندے میل دی چھوہیر اوندی برادری وچ کوئنی۔ ایں طرحاں اوندے دل وچ ہک ہلکی پھُلکی شادی دی خواہش وی جاگی۔ اوندی کلاس فیلو سلمیٰ ہئی جیڑھی شیدو کوں شیدو دے خیال وچ پسند کریندی ہئی۔ سلمیٰ دا سوہݨا قد چِٹی رنگت اَتے امیر ہووݨ اوندیاں صفتاں ہَن۔ تعلیم تاں ݙوہیں دی برابر ہئی ۔ شیدو سلمیٰ کوں شادی دا ٹارگٹ بݨا گِدھا۔ جݙاں جو اوندی کلاس فیلو شیدو کوں اپݨی تعلیمی مدد واسطے استعمال کریندی ہئی۔ ایہہ ڳالھ ݙونہیں آپس اِچ کھول نہ سڳئیے۔ خالی پیریڈ ہوندے ہن تاں ݙونہیں کینٹین تے ٻہہ تے ریفریشمنٹ وی کریندے ہن تے نال کوئی تعلیمی امداد وی۔
سہ ماہی امتحان شروع تھی ڳئے تے سلمیٰ کوں اپݨے پیپریں دی تیاری واسطے شیدو دی لوڑھ پئی۔سلمیٰ شیدو کوں اپݨے دیفنس والے بنگلے تے امتحان دے ݙینہہ ٹِکݨ دی دعوت ݙتی۔ شیدو کوں ٻیا کیا چاہیدا ہا۔ رہائش مُفت ،روٹی مفت، بنگلہ ڈیفنس دا ، اعلیٰ بیڈ تے سوہݨی کلاس فیلو دی سنگت ۔ کوٹھی ہک کنال رقبے وچ بݨی کھڑی ہئی تے دنیا دی ہر سہولت اُوں کوٹھی وچ موجود ہئی۔ کوٹھی دا سوہݨا گیٹ ، کھلا گیراج، اعلیٰ گراسی پلاٹ، برامدہ، ڈرائینگ روم، گھر دے ہر بندے دا علیحدہ بیڈ روم، سرونٹ کوارٹر سارے انجو انج کھڑے ہن۔ گھر دے وچ کل ترئے جی رہندے ہن۔ ہک چھوکری تے اوندے پیو ماء ۔
چھوکری شیدو کوں اپݨے بیڈ روم اِچ گھِن ڳئی ۔ بیڈ روم کیا ہئی ہک بہشت ہئی۔ ترئے لکھ روپے توں زیادہ دا ڈبل بیڈ، سنگھار میز ، سائیڈ چیئرز، اعلیٰ غیر ملکی سامان دے نال سِجھا ہویا اٹیچ باتھ وغیرہ ۔ شام توݨی تاں ݙوہیں شیدو تے سلمیٰ علیحدہ علیحدہ کرسیں تے ٻہہ تے پڑھدے رہ ڳئے۔ اوندے بعد ݙونہیں ڈبل بیڈ تے آڳئے۔ ڈبل کمبل اپݨے ڄنگھیںتے سٹ تے بیڈ دے سوہݨے تاج نال لڑ ٻیٹھے تے ، کندح پچھوں سراݨے لاتھے پڑھدے رہ ڳئے۔ݙونہیں دے درمیان اِچ ہک سراہݨا پیا ہا جیندے اُتے او اپݨے بال پوائنٹ اَتے ،مارکر ، کچی پنسلاں ، ربڑ وغیرہ دا ݙبہ رکھی پئے ہن۔ ایں دوران چھوہیر دا پیو کمرے وچ داخل تھیا تے سارا کجھ ݙٹھا۔ ݙونہیں کوں پڑھدا ݙیکھ تے اُوندا دِل خوش تھیا تے نال ہی اپݨے مونہہ وچ اَلیندا رہیا جو ایہہ ڈیفنس اے۔
رات دے ݙاہ وڄے وَل آیا تے وَل انہائیں کوں پڑھدا ݙٹھا تاں وَل اُوہا ڳالھ کیتی جو کوئی بات نہیں ایہ ڈیفنس ہے۔ رات گزر ڳئی سویر تھئی سِجھ اُبھرݨ توں پہلے پیو وَل کمرے دا چکر لایا تاں اندروں شیدو تے چھوہیر کوں بیڈ دے اُتے پرے پرے سُتا ݙیکھ تے وَل واپس چلیا ڳیا ایہو سوچ کے جو کوئی نی ایہ ݙیفنس ہے۔ تھوڑی دیر بعد ناشتے دا پتہ کرݨ پیو وَل آیا۔ کمرے وچ کھڑا ہا تے کمرے وچ لڳے پردے کوں اوندا ہتھ لڳ پیا۔ پردہ تھوڑ ا تھوڑا سِنا ہا۔ پیو تاں کوڑِیج پیا۔ شیدو دی کیاڑی کنوں پکڑ تے گراج اِ چ گھیل آیا تے اونکوں ترئے دھپ مارے اتے اُچا اُچا اَلایا۔ جو تیکوں پتہ کائنی۔ اے ڈیفنس ہے، پاڳل دے پُتر آ، جاہل آ، تیکوں ڈیفنس وچ راہوݨ دا ݙاں وی نی آندا۔ نال دے ہمسائیں لُڑ پھاکا سُݨیا تاں نکل آئے تے وَل آ تے پُچھیا : کیا مسئلہ ہے۔ چھوکری دے پیو ݙسیا جو ایہہ چھوہر جیڑھا اپݨا ناں شیدو ݙسیندے کلہوکا ساݙے گھر آیا ہویا ہے اَتے میݙی دھی دا کلاس فیلو ہے، سویر توݨی کٹھے پڑھدے رہ ڳن۔ کوئی بات نہیں ، ہکے کمرے وچ پڑھݨ چنگی ڳالھ ہے کیوں جو ایہہ ڈیفنس ہے مگر سویر ے میݙا پردے کوں اچݨ چیت ہتھ لڳے۔ تاں پردہ سِنا ہا۔ وَل ہمسائیں وی شیدو کنوں پچھے ، ووئے لونڈے ایہہ پردہ سِنا کیوں ہا؟ شیدو آکھیے جو میں پردے نال اپݨا جلدی وچ نک صاف کیتا ہا چاچے ہوریں کوڑیج پِن۔ چھوکری دے پیو آکھیا: ایں جاہل کوں ایہہ پتہ کوئنی جو پردے نال نک صاف نی کریندا ،ٹشو پیپر موجود پئین۔ آخر ایہہ ݙیفنس ہے۔
٭٭٭
حوالہ
[لکھو | ماخذ وچ تبدیلی کرو]کتاب: وتر ساخ (سرائیکی کہاݨیاں) ، مصنف : عبداللطیف بھٹی، ناشر: جھوک پبلشرز ،ملتان