آخر اے ڈیفنس اے

فقیرو اوکھیں سوکھیں آپݨے علاقے وچوں گریجوایشن کر تے ہک وݙے شہر وچ ہک یونیورسٹی وچ داخلہ ونڄ ڳھدا ، محنتی ہا ، چنڳے نمبر پیندا ہا تے آپݨا خرچہ وی محنت مزدوری کر تے پورا کر گھندا ہا سال تھی ڳیا ہس چنڳے کپڑے پاوݨ لڳ ڳیا تے اُٹھݨ ٻہݨ وی کجھ نہ کجھ شہری طرز دا سکھ ڳیا ہا ۔ جیلے اونکوں اے پتہ لڳا جو او کوئی نہ کوئی شئے زندگی اچ بݨ ویسے تے شادی واسطے آپݨی برادری اچ کوئی خاص رشتہ نظر نہ آوݨ پاروں مسئلہ بݨسی تاں اوں چنڳے رشتے دی ڳول شروع کر ݙتی ۔اوندی ہک کلاس فیلو اوندے نال چنڳی آئو بھگت شروع کر ݙتی ، فقیرو شکلوں سوہݨا ہا قد بت وی ٹھیک ہس تعلیم اوہا جیرھی نظردی پی ہئی تے پِچھوں تعارف صرف اللہ دا ناں ۔ ایندے دل اچ آیا جو ایہا کلاس فیلو جیرھی جو امیر کبیر گھر دی ہے مل پووے تاں زندگی سدھر ویسی ۔ جݙاں جو اوندی کلاس فیلو صرف تعلیمی مدد واسطے فقیرو کوں آپݨا دوست بݨائی پی ہئی تے آپݨاں ہم سفر بݨاوݨ دا کݙاہیں اوں سوچیا وی نہ ہا ۔ اے ڳال ݙوہیں آپت اِچ کلیئر وی نہ کر سڳیے ۔ جیڑھے پیریڈ خالی ہوندے ہن اے ݙوہیں کنٹین تے یا کہیں درخت دی چھاں تلے کٹھے ونڄ ٻہندے ہن تے اُتھاں پڑھدے رہے ویندے ہن ۔ ڄہاڑے گزردے پے ہن ۔ پیپر شروع تھئے تاں لڑکی فقیرو کو ں آکھیا جو پیپریں دی تیاری دے ݙینھوار توں اساݙے بنگلے تے ڄل ٹِک۔ اُنہیں دا بنگلہ شہر دے پوش ایریا ڈیفنس وچ ہئی ۔ کوٹھی ہک کنال رقبے وچ بݨی کھڑی ہئی تے دنیا دی ہر سہولت اوں کوٹھی وچ موجود ہئی ۔ کوٹھی وچ پہندیں نال ای ہاں ٹھردا ہا ۔ سوہݨا گیٹ ، کھلا گیراج ، اعلیٰ گراسی پلاٹ، برآمدہ، ڈرائنگ روم ، ہر بندے دا علیحدہ بیڈ روم ، سرونٹ کوارٹر علیحدہ علیحدہ کھڑے ہن ، گھر دے وچ بندیں دی تعداد صرف ترائے ہئی چھوکری تے اوندے پیو ماء ۔ چھوکری فقیرو کوں آپݨے بیڈروم وچ گھن ڳئی بیڈ کیا ہئی ہِک بہشت ہئی ۔ ݙو لکھیں توں زیادہ دا ڈٻل بیڈ، سنگھار میز، سائیڈ چیئرز، اٹیچ باتھ وغیرہ ۔ شام توݨیں تاں ݙونہیں فقیرو تے چھوہر کرسیں تے ٻہہ کے پڑھدے رہ ڳے ، اوندے بعد ݙوہیں بیڈ تے آ ڳے ، ڈٻل کنبل اپݨے ڄنڳھیں تے سٹ تے بیڈ دے سوہݨے تاج نال لڑ ٻیٹھے تے پڑھدے رہ ڳے ۔ ایں دوران چھوہر دا پیؤ کمرے وچ داخل تھیا تے سارا کجھ ݙٹھا ݙوہیں کوں پڑھدا ݙیکھ کے خوش تھیا تے نال ای آکھیُس کوئی بات نہیں اے ڈیفنس اے ۔ رات دے ݙاہ وڄے ول آیا تاں ول اُنہیں کوں پڑھدا ݙٹھا تاں ول اوہا ڳال کیتی جو کوئی بات نہیں اے ڈیفنس اے۔ رات گزر ڳئی سویر تھئی سِجھ اُبھرݨ توں پہلے پیؤ ول کمرے دا چکر لایا تاں اندروں فقیرو تے چھوہر کوں نندر سُتا ݙیکھ تے ول واپس چلیا ڳیا ایہو سوچ کے جو کوئی نی اے ڈیفنس اے ۔ تھوڑی دیر بعد ناشتے دا پتہ کرݨ پیؤ ول آیا کمرے اِچ کھڑا ہا تے ہتھ کمرے وچ لڳے پردے کوں لڳ پیا ۔ پردا تھوڑا تھوڑا سِنا ہا ۔ پیؤ تاں کوڑیج پیا فقیرو دی کیاڑی کنوں پکڑ تے گیراج اچ گھیل آیا تے اونکوں ترائے دھپ ماریے تے اُچا اُچا الایا جو تیکوں پتہ کائنی جو اے ڈیفنس اے پاڳل دا پُتر آ جاہل آ تیکوں ڈیفنس اچ رہݨ دا ݙاہ وی نی امدا ۔نال دے ہمسائیں لُڑھ پھاکا سُݨیا تاں نکل آئے تے ول آ تے پُچھیا کیا مسئلہ ہے ؟ چھوکری دے پیؤ ݙسیا جو اے چھوہر جیرھا آپݨا ناں فقیرو ݙسیندے کلھوکا ساݙے گھر آیا ہویا ہے اور میݙی دھی دا کلاس فیلو اے ، سویر توݨیں کٹھے پڑھدے رہے ڳن کوئی بات نہیں ہکے کمرے وچ کٹھے پڑھݨ چنڳی ڳال اے کیوں جو اے ڈیفنس اے مگر سویرے میݙا اچانک پردے کوں ہتھ لڳے تاں پردہ سِنا ہا ۔ ول ہمسائے فقیرو کنوں پُچھیے جو پردہ سِنھا کیوں ہا ؟ فقیرو آکھیے جو میں پردے نال اَپݨا نک صاف کیتا ہا ۔ چاچے ہوریں کوڑیج پِن ۔ چھوکری دے پیؤ آکھیا ہِیں جاہل کوں اے پتہ کوئنی جو پردے نال نک صاف نی کریندا کیوں جو اے ڈیفنس اے ۔

حوالہ

کتاب: نِبَھو دی  ٻوٹی، مصنف: عبداللطیف بھٹی، ناشر :جھوک پبلشرز ملتان