آئن سٹائن دے دماغ دی کہانی

آئن سٹائن دے دماغ دی کہانی کجھ عجیب تے افسوسناک اے۔ آئن سٹائن دی موت دے بعد اوندا پوسٹ مارٹم کرݨ والے ڈاکٹر نے اوندا دماغ بغیر اجازت کڈھ گھدا ہا۔ اوں نے ہیندا مشاہدہ کیتا تے ولا ایندے 240 ٹکڑے کر تے اپݨے تہہ خانے اچ محفوظ کر گھدے تے آہستہ آہستہ تحقیق واسطے مختلف ادارئیں کوں ونڈا ݙتے۔ آئن سٹائن دا دماغ بالکل مختلف تاں نہ ہا مگر ہوندے کجھ حصئیں اچ عام انسانی دماغ کنوں کجھ فرق ہا۔ اور اْنہیں دا آپس دا تعلق عام دماغ کنوں زیادہ مضبوط ہا۔ خیال اے کیتا ویندے جو آئن سٹائن صرف ہک بہتر دماغ ہوݨ دی وجہ کنوں بہتر سائنسدان نہ ہا بلکہ دماغ زیادہ استعمال کرݨ دی وجہ کنوں بہتر سائنسدان بݨیا ہا۔ دماغ جتنا زیادہ تے اچھے طریقے نال استعمال کیتا ویسی تاں مزید بہتر کنوں بہتر تھیندا ویسی۔ دماغ کوں بہتر بنڑاوݨ اچ نویں تجربے، نویں خیال تے گہری سوچ دا ٻہوں وݙا عمل دخل اے۔ آئن سٹائن دے دماغ دے 46 ٹکڑے فلاڈیلفیا دے میوزیم نے 2013 اچ حاصل کیتے تے انہیں دی عام نمائش کیتی۔ اے ٹکڑے خوردبین تے تلے رکھ تے ݙٹھے ونڄ سڳدن۔ آئن سٹائن آخر آئن سٹائن کیوںہا؟اُنیں دی زندگی اچ گزرݨ والا ہر واقعے دا اپݨااثر ہا۔فزکس دے استاد دا اثر،  محبت دا اثر، دفتر دے ماحول دا اثر،  ریاضی دے مسلئے حل کرݨ دے بعد ملݨ والی حوصلہ افزائی دا اثر تے زندگی دے تجربات نے  اینجھا نروس سسٹم تے بائیولوجیکل مشینری بنڑائی ،  جیکوں اساں آئن سٹائن آہدوں۔  

حوالہ

کتاب: کائنات دا سفر ، مصنف : جعفر عباس بزدار ، ناشر: جھوک پبلشرز ملتان